Музей Гісторыі Баранавіцкага аддзялення Беларускай чыгункі — адкрыты 14 снежня 1984 года ў горадзе Баранавічы. У залах музея прадстаўлены гістарычныя дакументы, фотаматэрыялы, макеты тэхнікі, карціны, чыгуначная форма і іншыя экспанаты, якія адлюстроўваюць працу і побыт чыгуначнікаў.
Аддзел «Чыгуначная тэхніка» Музея Гісторыі Баранавіцкага аддзялення Беларускай чыгункі быў адкрыты 30 ліпеня 1999 г.
Баранавічы сваім нараджэннем абавязаны чыгунцы, аб чым сведчыць малюнак паравоза на гербе горада. У лістападзе 1871 года па маршруце Смаленск—Брэст адправіўся першы таварна-пасажырскі цягнік. Тады ж з'явілася чыгуначная станцыя з прадпрыемствамі, якія абслугоўвалі ўсю інфраструктуру чыгункі. Станцыя пасля дала жыццё цэламу гораду, ператварыўшы яго з цягам часу ў буйны прамысловы і чыгуначны цэнтр.
30 ліпеня 1999 г. у невялікі хваёвым гаі, у пяці хвілінах хады ад станцыі Баранавічы Палескія, быў створаны першы, і на той момант адзіны ў Беларусі, музей чыгуначнай тэхнікі. Музей быў створаны па ініцыятыве былога начальніка Баранавіцкага аддзялення, а затым начальніка Беларускай чыгункі Віктара Рыгоравіча Рахманько. Вялікую ролю ў ажыццяўленні гэтай ідэі сыграў Ілля Нікановіч Малюгін, які ўзначальваў Савет ветэранаў аддзялення чыгункі. Ён стаў першым навуковым супрацоўнікам музея і кіраўніком ўсіх работ па яго стварэнні.
На пастаменце ля ўваходу ў музей знаходзіцца макет паравоза серыі «У» у палову натуральнага памеру, што праехаў 28 лістапада 1871 года з першым цягніком праз Баранавічы ў Брэст. З гэтага дня пачалася гісторыя Беларускай чыгункі і горада Баранавічы. Каля макета паравоза маецца схема музея. Усе экспанаты забяспечаныя шыльдамі з кароткай інфармацыяй. Яны сабраны дзякуючы карпатлівай працы людзей, якія стваралі макеты і рыхтавалі арыгіналы да экспазіцыі. Некаторыя экспанаты шукалі не толькі па ўсёй рэспубліцы, але і далёка за межамі краіны. Музей валодае велізарнай калекцыяй паравозаў (ЭУ, ЭМ, ЭР, 9Пм, серыі «У» і «Л») і цеплавозаў (ТЭЗ, М62, ТЭП60, ТГК2 і ТГМ1). Тут прадстаўлены пасажырскія і грузавыя вагоны розных пакаленняў, вагонныя цялежкі, макет паста дзяжурнага па пераезду і памяшканне дзяжурнага станцыі, дзейсны семафор, пуцерамонтная тэхніка, комплекс прыладаў для забеспячэння паравозаў вадой (гідракалонка, паравы кацёл, паравая вадзяная помпа), тэхніка чыгуначных войскаў і нават зенітная кулямётная ўстаноўка.
Уваход у музей бясплатны.
