Сафіеўка — парк, навукова-даследчы інстытут Нацыянальнай акадэміі навук Украіны, размешчаны ў паўночнай частцы горада Умань Чаркаскай вобласці Украіны, на берагах ракі Каменкі. Штогод яго наведваюць каля 500 тысяч чалавек. Плошча — 179,2 га. У 2007 годзе Сафіеўка была названая адным з «Сямі цудаў Украіны».
«Сафіеўка» з'яўляецца помнікам ландшафтнага тыпу сусветнага садова-паркавага мастацтва канца XVIII — першай паловы XIX стагоддзя. У ёй расце звыш за 3323 таксонаў (відаў, формаў, гатункаў) мясцовых і экзатычных дрэў і кустоў, сярод іх: балотны кіпарыс, хвоя Веймутава, цюльпанавае дрэва, платан, гінкга, елкі і многія іншыя. Калектывам парка выдадзены каталог раслін, у якім налічваецца 1994 таксонаў, з іх 1220 драўняных і хмызняковых парод і 774 травяністых раслін, у тым ліку 25 таксонаў ляшчыны, 24 — букаў, 41 — елак, 100 — ліян, 320 — руж, 57 — рададэндранаў, 376 — глебапокрыўных і 98 — кветкавых раслін. У 2007 годзе калекцыя раслін парка ўключала 2103 таксонаў драўняных і 1212 травяністых.
