Яд ва-Шэм (іўр.: יד ושם) — нацыянальны мемарыял Катастрофы (Халакоста) і гераізму. Знаходзіцца ў Іерусаліме на Хар ха-Зікарон (Гара Памяці). Мемарыял быў заснаваны ў 1953 годзе па рашэнню Кнесета з мэтай увекавечыць памяць аб яўрэях — ахвярах нацызму ў 1933—1945 гадах, разбураных яўрэйскіх абшчынах, а таксама аддаць даніну павагі змагарам супраць фашызму і праведнікам свету, якія ратавалі яўрэяў, рызыкуючы ўласным жыццём. Мемарыял штогод наведвае больш за мільён чалавек.
Назва комплексу — «рука і імя», «памяць і імя» або «месца і імя» — паходзіць ад слоў прарока Ісаі: «І дам Я ім у доме Маім і ў сценах Маіх памяць і імя лепшае, чым сынам і дачкам; дам яму вечнае імя, якое не вынішчыцца.» (Іс.56: 5)
Знішчэнне яўрэяў у гады Другой сусветнай вайны ў многіх мовах атрымала назву «Халакост». У іўрыце, аднак, існуе іншы тэрмін — Шаа (השואה — бедства, катастрофа).
